وصفه اللي خلت شعري يبطل يسقط من اول مره

تمام يا حلوين دلؤتي بقى معاد الطريقه ومعلش اذا كان فيها توم وحلبه عارفه ان زمانكم بتقولو الريحه زفت قلبي عندكم والله بس الريحه ف الاخر مش بتبقى بشعه اوي زي مانتو متخيلين
بس المتجوزه بلاش تحطها والراجل ف البيت الا يطفش ولا يطلقها وتيجي تمسك ف خناقي
وانا ساعتها هعمل نفسي عم عبدو العبيط
ياريت تحطيها وجوزك ف الشغل وتغسليها قبل ما ييجي


ما علينا

اقولكم انا عملت ايه انا جبت

معلقتين حلبه كبار
ومعلقتين روزماري كبار
وطحنتهم مع بعض في المطحنه اللي هي بتاعت التوابل طبعا تغسليها كويس الاول وتنشفيها
وتطحني الحلبه والروزماري فيها
تمام كده هيبقو عاملين زي البودر الخشن

هتحطيهم ف بطرمان زجاج وتملي البطرمان زيت زتون بس تسيبي ربعه فاضي
وتقفلي البطرمان كويس وتجيبي حله تغلي فيه شويه مايه واول ما تغلي تقفلي النار
وتحطي البطرمان جواها (( حمام مايه يعني ))


لحد ما المايه تبرد اللي حوالين البطرمان ساعتها هتكوني محضره بتاع 7 او 8 فصوص توم
وتسيبيهم بقشرتهم
وتدقيهم ف الهون
وتحطيهم ف البطرمان وتقفلي
وتغلي المايه من تاني وتحطي البطرمان فيها نفس حمام المايه اللي فات
لحد ما المايه تبرد وتطلعي البطرمان

طبعا هتلاقي الزيت مش باين من الحاجات اللي حواليه
هتسيبيه شويه لتاني يوم منقوع بالتوم والحاجات دي
وتقومي جايبه صفايه عيونها ضيقه وتصفي الزيت من القشر والتوم اللي جواها هترمي طبعا القشر ف الزباله مش محتاجينه
هيتفضل عندك الزيت


انا بقى اخدت من الزيت ده وكنت غاسله شعري
استنيت لما شعري نشف
وروحت داعكه فروة الراس جامد
ولبست كيس بلاستيك وفوقيه ايشارب ونمت بيها
واول ما صحيت الصبح غسلته بالشامبو

ووالله العظيم بسرح مالقيت ولا شعره سقطت انا ذهلت لان قبلها بيوم كان شعري بيسقط بالهبل وكنت مع الوقت هبقى قرعه
انا كده خلصت

اها صحيح ياريت اللي بيسالو عن فوايد المكونات يدورو عليها على جوجل وشوفو الحلبه والتوم فوايدهم ايه للشعر
تحففففففففففففففه