خلطتين مهمين فى مطبخك

السلام عليكم اخواتى
النهاردة هنعمل خلطتين مهمين وبيسهلو علينا شغل المطبخ
الخلطه الاولى
نجيب كام راس توم وشطه وفلفل اخضر
كمون وفلفل اسود وشويه كسبرة مش كتير
كركم برضه مش كتير وطبعا ملح ونفرمهم فى الكبه فرم ناعم
تحطيها فى علبه بلاستيك وتحطيها فى الفريزر
الخلطه دى هتنفعك فى تتبيل السمك بجميع انواعه المشوى السنجارى والمقلى و الصنيه والجمبرى
وتتبيل الكبدة اللى بتتقلى بالردة
ولعمل الطحينه وبابا غنوج وممكن كمان نطلع منها ونعصر لمون او خل ونخلل بيها الطماطم والبتنجان
الخلطه التانيه
راس توم معلقه شطه كبيرة ومعلقه كمون كبيرة ونص معلقه صغيرة فلفل اسود
ونفرهم ناعم جدا ونحط عليهم كوب خل ونص كوب ميه ولو فى لمون نعصر كام واحدة
عليهم ونقلبهم كويس ونحطهم فى ازازة فاضيه
طبعا هتقولى لى هنعمل بيها ايه
هقولك
دى دقه الكشرى المصرى اللى بعدس بجبه وكمان الكشرى بعدس اصفر
وكمان لفته العدس لما تحطى منها على الوش بتدى طعم وريحه تجنن
وطبعا لطبق الفول بالزيت واللمون تحطى منها
وممكن تاخدى منها شويه وتعملى منها سلطه طحينه سريعه لو مستعجله ومعلقه صغيرة على طبق السلطه الخضرا
ترشى منها على البتنجان المقلى بيخلى طعمه تحفه
دى مش شرط تتحط فى الفريزر او التلاجه
ممكن تحطيها عادى جدا على رف فى اى مكان فى مطبخك
هااااااااا ايه رأيكم